بالخط الاحمر نكتب اكبر عباره
احذر ترانا الموت مانقبل السوم
فينا ولاء معها شموخ وطهاره
حب الوطن فطره وحنا لها نجوم
في حكم ال سعود حكم الجساره
للمجد قمه وللفخر طيرنا يحوم
سلمان فخر الدار والدار داره
حنا بامره ايده اللي بها يشوم
ومحمد اللي ماشيٍ في مساره
واثق بخطواته شجاع ٍ وزيزوم
هذا الوطن نمسك عليه الخفاره
والسيف الاجرب ساطي بين الخصوم
ندك ارض المعتدي في اشاره
ونقلب اراضيها كما الموت محتوم
ونرسم لها غاره تجي عقب غاره
ويصير عاليها مع اسفلها مردوم
حب الوطن شامخ وصعب انهياره
حب الوطن غالي ولا يقبل السوم
الشاعره / هناء الصميد
متميزه دائماً وابداً بأشعارك وصح الله لسانك.
صح لسانك وعتلى شانك ابيات وافية والوطنيه عاليه فيها .
ماشاء الله شاعرة مبدعة دائما
صح لسان الشاعرة قصيدة جزلة تليق بيوم التأسيس لها طابع وطني جميل ، واستمدينا من القصيدة حب الوطن الشامخ .